2Ch 4 | NdeIBE | STEP | Wenza i-alithare lethusi elizingalo ezingamatshumi amabili ubude balo, lezingamatshumi amabili ububanzi njalo izingalo ezilitshumi ukuya phezulu.

2 Chronicles 4

Izimpahla zeThempeli

1 Wenza i-alithare lethusi elizingalo ezingamatshumi amabili ubude balo, lezingamatshumi amabili ububanzi njalo izingalo ezilitshumi ukuya phezulu. 2 Wasesenza uLwandle ngethusi elincibilikisiweyo, luyisizingelezi, luzingalo ezilitshumi ukusuka okhunjini kusiya kolunye ukhumbi njalo luzingalo ezinhlanu ukuya phezulu. Isilinganiso sokuluzingelezela sizingalo ezingamatshumi amathathu. 3 Ngaphansi komphetho, kulezinkunzi eziluzingelezileyo – ingalo nganye iletshumi. Izinkunzi zazibunjelwe emizileni emibili ndawonye loLwandle.

4 ULwandle lwalumi phezu kwezinkunzi ezilitshumi lambili, ezintathu zikhangele enyakatho, ezintathu zikhangele entshonalanga, ezintathu eningizimu kanye lezintathu zikhangele empumalanga. ULwandle lwalumi phezu kwazo, izinqe zazo zazifulathele ngaphakathi. 5 Uhlonzi lwalungangobubanzi besandla, umphetho walo unjengomphetho wenkomitsho njengeluba liqhakaza. Lwaluthwala amatanka ayizinkulungwane ezintathu.

6 Wasesenza izinditshi zokugezela ezilitshumi, ezinhlanu wazifaka eceleni laseningizimu ezinye ezinhlanu wazifaka enyakatho. Zazingezokuhlambululela izinto zokusetshenziswa eminikelweni yokutshiswa, kodwa uLwandle lwalungolokugezela abaphristi.

7 Wenza izinti zezibane zegolide ezilitshumi elandela isilinganiso sazo, wazifaka ethempelini, ezinhlanu zazo eceleni leningizimu ezinye ezinhlanu ngenyakatho.

8 Wenza amatafula alitshumi wawafaka ethempelini, amahlanu ngeningizimu kwathi amahlanu ngenyakatho. Njalo wenza imiganu elikhulu eyegolide eyokuchela.

9 Wenza iguma labaphristi, leguma elikhulu kanye lezivalo zeguma, wasehuqa izivalo ngethusi. 10 Wafaka uLwandle eceleni langeningizimu ejikweni langeningizimu yempumalanga.

11 Wenza njalo lezimbiza lamafotsholo lemiganu yokuchela. Kwaba yikuqeda kukaHuramu umsebenzi ayezinikele ukuwenzela inkosi uSolomoni ethempelini likaNkulunkulu:

12 izinsika ezimbili; iziduku eziyingubhe phezu kwezinsika; okwelukiweyo kungakubili kucecise iziduku eziyingubhe phezu kwezinsika; 13 amaphomegranethi angamakhulu amane ezalukweni ezingambili (imizila emibili yamaphomegranethi esalukweni ngasinye, kucecisa iziduku eziyingubhe phezu kwezinsika);

14 izinti ezilezinditshi phezulu;

15 uLwandle lezinkunzi ezilitshumi lambili ngaphansi kwalo;

16 izimbiza, amafotsholo, izinti zenyama lakho konke okuhambelana lalokho. Zonke izinto uHuramu-Abhi azenzela inkosi uSolomoni ezethempeli likaJehova zazingezethusi elilolongiweyo. 17 Inkosi yabumbela lezozinto ngebumba emagcekeni aseJodani phakathi kweSukhothi leZarethani. 18 Zonke lezizinto ezenziwa nguSolomoni zazinengi okukuthi isisindo sethusi lazo sasingalinganiswanga.

19 USolomoni wenza zonke izinto ezazisethempelini likaNkulunkulu: i-alithare legolide; amatafula esinkwa Sobukhona; 20 izinti zezibane zegolide elihle lezibane zazo zokukhanyisa endlini engaphakathi njengokumisiweyo,

21 lamaluba enziwe ngegolide lezibane lezindlawu (zazenziwe ngegolide elihle);

22 Izihlokozo zezibane ezegolide, imiganu yokuchela, lezindengezi zokuthwala umlilo, lezivalo zethempeli eziligolide, izivalo zangaphakathi eNdaweni eNgcwele Kakhulu lezivalo zendlu enkulu.